Rom 13 | MHL | STEP | Aria ni unowiya wi anim onoma ekima wia opap baliwep ikowa-ke ikua. Moram anim onoma wieniw me aremik, weetak. Mua Maneka-ke wia wueya wi uuwami miiw unowa urufimik.

Romans 13

I anim onoma opora wiar ookiyen

1 Aria ni unowiya wi anim onoma ekima wia opap baliwep ikowa-ke ikua. Moram anim onoma wieniw me aremik, weetak. Mua Maneka-ke wia wueya wi uuwami miiw unowa urufimik. 2 Naapeya wi mua wi anim onoma opora wiar fienimik nain wi Mua Maneka opora pun wiar fienimik. Neeke wiena wiam ekerimik. 3 Moram mua sira eliwa onimik nain anim onoma me wia keker opimik. Makena, mua sira samora onimik nain-ke anim onoma wia keker opimik. Naapeya anim onoma me efa samoruk naiman-i? Naap nain ni sira eliwa-pa ikeka, naeya mua eliwa-ke nia naikuan. 4 Moram wis pun Mua Maneka uuwow mua-ke, baliwep pokowa nain yia pirimik. Nain no sira samora-ko onap-na maa senam. Mua Maneka ona uuwowa nain wieya wi sirirowa niowa kekanowa onaiya ikemik. 5 Naapeya wi sira wiokowa-ke eliw. Me sirirowa aawowa keker opap sira eliwa ookimik, weetak. I Mua Maneka kookalowa wiar ookami sira eliwa-pa ikaiyen, naap naem-ikowa-ke.

6 Naapeya ni takis ariman. Ne maamuma nainiw wi anim onoma uuwowa baliwep faem-ikaikuan. Moram Mua Maneka ona wia pepekimeya wi uuwimik. 7 Ne takis sira kamenap nain pun eliw wuowen. Takis sira-sira naiwkin takis areka. Wi anim onoma ne wi woos mua unowiya ekima wia opap wi sira-sira wuimik nain ookeka.

Baliwep ikok yiam kookalem-ikowa

8 Aria ni mua oko muuna kuisow me niar ikainok. Ne maa kuisow fain muuna saarik eliw niar ikainon, feenap, mua wia kookalem-ikowa. Mua eena mua oko wia kookalep wia saliwiya nain Moses sira wuomakek nain ookowa iiwawun silewinon. 9 Sira unowa nain feenap, soma me oreka, mua oko me wia ifakimeka, me ikumareka, mua oko maa me wiar kema kueka. Sira unowa nain epaskun wuami feenap maemik, “Mua wia kookale, nena name kookalin naap.” 10 Naapeya no mua wia kookalinan-na me wia samorinan. Naeya mua oko wia kookalin nain no Moses sira wuomakek nain baliwep akena ookami kapa teekin.

11 Epa fain maa muutitik pupep kema pukeka, ni inow epa iiriw weeserek. Moram iiriw i Krais opora wiar opimik nain Mua Maneka yia aawowa epa eewuar ikua, ne aakisa tiil akena wiar arikua. Naapeya ni aakisa mokoka wilineka. 12 Epa kokoma ikok epa nan parinarem-ikaiya. Naapeya sira-sira epa kokoma-pa ikok kokot onimik nain piipuikua. Piipuap iikirami irakow maa unowa mia-pa wuap parina-pa ikok sira samora fienikua. 13 I baliwep ikaikua, wi mua epa wiimeya maa baliwep urufimik naap. I feenap me onikua, maapora maneka onap eka kekanowa me enimikua. Uruw mia yiam kaikikua ne sira samo-samora me yiam onikua. Me irakikua, ne maa me wiar kema kuikua. 14 Sira nain piipuap yiena Maneka Yeesus Krais eena konima saarik aeka. Mia kookalowa ookami sira samo-samora onam-ikowa nain iiwawun piipu-afureka.